Söngsveitin Fílharmónía flytur eitt mesta stórvirki kórbókmenntanna, Ein Deutsches Requiem, eftir Johannes Brahms á tvennum tónleikum í Langholtskirkju dagana 25. og 26. október kl. 16. Einsöngvarar  eru Kristinn Sigmundsson og Hallveig Rúnarsdóttir. Verkið er flutt í útsetningu fyrir tvö píanó og pákur. Um píanóleik sjá þær Guðríður St. Sigurðardóttir og Brynhildur Ásgeirsdóttir. Pákuleikari er Eggert Pálsson.

Ein Deutsches Requiem eða Þýska sálumessan er viðamikið kórverk og á tónleikunum telur Fílharmónía áttatíu söngvara. Í hópnum nú eru fjölmargir söngvarar sem eru svo heppnir að hafa tekið þátt í flutningi verksins áður en síðast flutti Söngsveitin Fílharmónía verkið með Sinfóníuhljómsveit Íslands í Háskólabíói vorið 2008, auk þess sem kórinn fór með verkið í söngför til Wrochlaw í Póllandi sama ár.

Verkið er afar tilkomumikið og meistaralega samið en Brahms notaðist við þýskan texta lútherskrar útgáfu Biblíunnar. Sjálfur vísaði Brahms til tónverksins sem hinnar mannlegu sálumessu vegna þeirrar áherslu sem hann leggur á að hugga eftirlifendur og segja má að tónlistin sé allt í senn, full af von og huggun þó hinn tragíski þráður sé aldrei langt undan.

Hér er um stórviðburð í íslensku tónlistarlífi að ræða sem enginn unnandi rómantískra meistaraverka má láta framhjá sér fara.

Miðasala fer fram á midi.is og við innganginn

Söngsveitin Fílharmónia getur bætt við sig karlaröddum. Verkefni starfsársins eru mörg og fjölbreytt, m.a. Sálumessa Brahms nú í október, jólatónleikar og Theresiumessa Haydns ásamt Sinfóníhljómsveit áhugamanna í mars. Með vorinu verður lögð áhersla á nýlega kórtónlist.

Áhugasamir eru hvattir til að hafa samband við kórstjórann, Magnús Ragnarsson í síma 6989926 eða á netfangið magnus.ragnarsson(hjá)gmail.com

Söngsveitin Fílharmónia tekur þátt í Sálmafossi í Hallgrímskrikju á Menningarnótt. Þar flytur kórinn efnisskrá þá sem flutt var í kórakeppninni í Llangollen í Wales í sumar.  Dagskrá kórsins er um klukkustundarlöng og hefst kl. 17.

Söngsveitin Fílharmónía hreppti þriðja sætið í keppni blandaðra kóra á alþjóðlegu tónlistarhátíðinni Eisteddfod í Llangollen í Wales. Alls tóku níu kórar þátt í þessum flokki m.a. frá Eistlandi, Bandaríkjunum og Argentínu sem fór með sigur af hólmi en kór frá Kosta Ríka vermdi annað sætið. Keppnislög Söngsveitarinnar voru þrjú, “Northern lights” eftir Ola Gjeilo, ” Ég vil llofa eina þá” eftir Báru Grímsdóttur og “The Conversion of Saul” eftir Randall Stroope. Ferðin í heild sinni var ákaflega vel heppnuð og kom kórinn margoft fram með dagskrá þar sem íslensk kórlög voru í fyrirrúmi.

Eisteddfod hefur merkilega sögu og var fyrst haldin árið 1947 í þeim tilgangi að sameina fólk í söng og tónlistarflutningi. Mikill fjöldi sjálfboðaliða kemur að skipulagningunni og utanumhaldi hátíðarinnar sem var til mikillar fyrirmyndar. Hægt er að sjá og hlýða á flutning hinna fjölmörgu kóra og danshópa sem komu fram á Eisteddfod.

Aðalfundur og Llangollen

Í gær var haldinn aðalfundur Söngsveitarinnar Fílharmóníu þar sem farið var yfir starfsemi 54. starfsár kórsins og kosið til stjórnar. Formaður verður áfram Agla Ástbjörnsdóttir og aðalstjórn skipa þau Birna Eiríksdóttir, Haukur K. Bragason, Þóra Harðardóttir og Þórsteinn Ágústsson. Varastjórn skipa Ásdís Björk Kristánsdóttir, Rannveig Magnúsdóttir og Þengill Ólafsson.

Venja er að ljúka starfsárinu með aðalfundi en að þessu sinni eru kórfélagar og stjórnandi hans langt í frá komin í sumarfrí frá indælum söng og nærandi samveru.  Ástæðan er þátttaka í alþjóðlegri tónlistarhátíð sem fram fer í Llangollen í Wales dagana 7.-14. júlí . Þar mun kórinn koma fram á eigin tónleikum auk þess að keppa í tveimur flokkum blandaðra kóra.  Mikil tilhlökkun ríkir í hópnum sem er staðráðinn í að gera sitt besta á mótinu en umfram allt njóta.

Á starfsárinu hefur kórinn komið sextán sinnum fram m.a.  á kóramóti Landssamands blandaðara kóra í Hörpu, á tvennum hausttónleikum, tvennum jóla- og aðventutónleikum og hvorki meira né minna en sjö tónleikum þar sem efnisskrá Walesferðarinnar var flutt, sunnan lands og norðan. Á þrennum tónleikum, í Reykjavík, á Akureyri og í Skálholti, var haft skemmtilegt samstarf við þrjá kóra, Kór Neskirkju, Kór Akureyrarkirkju og kammerkórinn Melodiu.

Næsti vetur

Nú þegar liggja fyrir drög að næsta vetri.  Við munum hefja haustið á því að æfa Sálumessu Brahms – ein Deutches Requiem af fullum þunga fram að tvennum tónleikum í Langholtskirkju, dagana 25. og 26. október. Einsöngvarar á tónleikunum verða þau Kristinn Sigmundsson og Hallveig Rúnarsdóttir og meðleikarar á tvö píanó verða þær Guðríður St. Sigurðardóttir og Brynhildur Ásgeirsdóttir.  Það verður gaman að takast á við þetta verkefni ásamt öðrum spennandi verkefnum á næsta starfsári sem hefst áður en langt um líður. En fram að því óskar Söngsveitin Fílaharmónía þess að velunnarar kórsins njóti sumarsins og þakkar þeim samfylgdina á starfsárinu.

Gleðilegt sumar!