Tónleikar 4.maí

Tónleikar Fílharmóníu í Reykholtskirkju
4. maí kl 16.00

Söngsveitin Fílharmónía flytur Requiem eftir Gabriel Fauré auk ýmissa annarra verka hinn 4. maí næstkomandi í Reykholtskirkju.

Requiem, eða sálumessa, Fauré var skrifuð undir lok 19. aldar og inniheldur hina vel þekktu Pie Jesu aríu, sem Rakel Edda Guðmundstóttir mun flytja með kórnum að þessu sinni. Lokakafli verksins, In Paradisum, er einstaklega hughljúfur og bjartur áheyrnar og slær á strengi vonar í lok sálumessunnar, um að lífið fyrir handan sé ekki endilok alls heldur þvert á móti.

Verkið sem í heild er ástsælt, angurvært og fallegt í flutningi, en það er til útsett bæði fyrir strengi og kór og fyrir orgel og kór. Að þessu sinni mun orgelleikur Magnúsar Ragnarsson stjórnanda Fílharmóníu berast um Reykholtskirkju í verkinu en gestastjórnandinn Sigurður Árni Jónssons stjórnar þeim hluta tónleikanna.

Auk Sálumessunnar kennir ýmissa grasa á efnisskránni, en meðal annars verður flutt nýtt verk eftir stjórnanda kórsins  sem ber heitið Tíminn og vatnið og er samið við ljóð Steins Steinarrs. Á efnisskránni eru jafnframt fjölbreytt kórverk eftir íslensk og erlend tónskáld. Eitt þeirra er nýstárlegt verk eftir Eric Whitacre. Hann er nokkurs konar „rokkstjarna“ kórheimsins, og verkið ber heitið Cloudburst.

Söngsveitin Fílharmónía var stofnuð árið 1959 í því skyni að flytja stór kórverk með sinfóníuhljómsveit og einsöngvurum en dr. Róbert A. Ottósson var fyrsti stjórnandi hennar. Hún hefur starfað alla tíð síðan og flutt fjölda stórra kórverka, nú síðast í febrúar tók hún þátt í flutningi Carminu Burana með í Eldborg. Að jafnaði eru kórfélagar 60 – 70 talsins.

Miðasala er hjá kórfélögum og við innganginn.
Allar nánari upplýsingar veitir Lilja Árnadóttir formaður kórsins s. 8985290

 

Tónleikar 21.apríl 2013

Söngsveitin Fíharmónía og Duo Harpverk

Tónleikar í Seltjarnarneskirkju sunnudagskvöldið 21. apríl kl. 20.00

Sunnudaginn næstkomandi þann 21. apríl heldur Söngsveitin Fílharmónía tónleika í Seltjarnarneskirkju kl 20. Leiðarstef þeirra er tími og vatn. Á efnisskránni eru fjölbeytt kórverk, íslensk og erlend. Þau eru t.d. eftir Óliver Kentish, Þorkel Sigurbjörnsson, Jón Nordal, Gunnstein Ólafsson og ungt upprennandi tónskáld Gísla Magnússon.Þá verður frumflutt verk eftir stjórnanda kórsins, Magnús Ragnarsson sem ber heitið Tíminn og vatnið og er samið við fyrsta og annað ljóð í bálki Steins Steinars. Af útlendu verkunum ber hæst verkiðCloudburst eftir ameríska tónskáldið Eric Whitacre, sem er nokkurs konar „rokkstjarna“ kórheimsins.

Á tónleikunum kemur jafnframt fram Duo Harpverk með slagverksgjörning. Það er skipað hörpuleikaranum Katie Buckley og slagverksleikaranum Frank Aarnink.

Miðar fást í 12 tónum á Skólavörðustíg, hjá kórfélögum og við innganginn. Þeir kosta kr. 2000,- og hálfvirði er fyrir börn undir 12 ára aldri.

Tónleikarnir verða í Seltjarnarneskirkju (sjá kort) 21. apríl og hefjast klukkan 20. Miðasala er hjá kórfélögum, í 12 tónum og við innganginn. Miðaverð er 2000 kr. en 1000 kr. fyrir börn 12 ára og yngri.

Carmina Burana fimmtudaginn 7. febrúar kl. 19.30 í Eldborg

Æfingar á sívinsælu verki Carl Orff Carmina Burana standa yfir. Sjá um væntanlega tónleika í Eldborg:

http://www.sinfonia.is/ tonleikar/2013/2/7/nr/1974

Tónleikar Söngsveitarinnar Fílharmóníu í Kristskirkju Landakoti
27. desember kl. 20.00

Söngsveitin heldur jólatónleika á þriðja degi jóla þann 27. desember kl. 20.00. Á efnisskránni eru jólalög af ýmsu tagi m.a. þjóðlagið Hátíð fer að höndum ein í útsetningu Jóns Ásgeirssonar, Ave María Sigvalda Kaldalóns, gömul erlend lög eins og Hin fegursta rósin er fundin og franska 16. aldar lagið Opin standa himins hlið. Þá syngur kórinn Ave Maria eftir Caccini með styrku liðsinni einsöngvarans, Hallveigar Rúnarsdóttur sópran en hún flytur Ecco aríu úr Jólaóratóríu Bach með organistanum Steingrími Þórhallssyni en öllu saman stjórnar Magnús Ragnarsson.

Hátíðabragur verður yfir stundinni í Kristskirkju á þriðja í jólum og kjörið tækifæri fyrir tónleikagesti að fá hvíld og öðlast hugaró eftir annasama aðventuna, góð og gleðileg jól.

Miðar verða seldir við innganginn en öruggast er að tryggja sér miða hjá kórfélögum fyrirfram.

Hausttónleikar Fílharmóníu 2012

Eins og venja hefur verið undanfarin ár mun Fílharmónía syngja tvenna sjálfstæða tónleika nú í október. Kórinn er á leið í ferð til Austurríkis næsta sumar og tónleikahald því liður í undirbúningi fyrir það ferðalag.

Tvö spennandi stykki eru á efnisskránni, annars vegar Misa Criolla eftir Ariel Ramírez og hins vegar Mariamusik eftir sænska tónskáldið Anders Öhrwall.

Eins og áður sagði verða tónleikarnir tvennir. Hinir fyrri verða 14. október í Seltjarnarneskirkju og hinir síðari hinn 15. október í Guðríðarkirkju í Grafarholti. Báðir tónleikarnir hefjast klukkan átta.

Misa Criolla (1964) er taktföst messa, sungin á spænsku og er skrifuð fyrir kór, einsöngvara og hljómsveit. Mismunandi tónlistarhefðir S-Ameríku lita verkið sem er með eindæmum einstakt og ánægjulegt áheyrnar. Einsöngvarar eru Einar Clausen, einn af okkar fremstu tenórsöngvurum, og Akureyringurinn Jón Svafar Jósefsson, barítón.

Mariamusik (1974) er eftir sænska tónskáldið Anders Öhrwall, sem er mörgum kunnur fyrir jólaútsetningar sínar, og er byggð á textum og tónlist um Maríu Mey frá 14., 15. og 16 öld. Sumir kaflarnir bera raunar sterkan keim af styrk Öhrwalls sem jólatónskálds og er á stundum nokkur hátíðarbragur yfir stykkinu, sem sungið er á íslensku. Lesari er Þorleifur Hauksson.

Tónleikarnir eru um tvær klukkustundir með hléi og almennt miðaverð er 3.500 krónur en börn undir 12 ára greiða hálft verð. Forsöluverð er 2.900 krónur og gildir það fram að tónleikadegi.

Miðar fást í 12 tónum á Skólavörðustíg, hjá kórfélögum og við innganginn.

Gleðilegt sumar!

Fílharmónían lauk starfsári sínu þann 6. júní sl. með aðalfundi, þar sem farið var yfir starf vetrarins. Meðal þess sem fram kom, var að æfingar hefðu verið 48 talsins frá september fram í maí og má því segja að kórinn hafi ekki setið auðum höndum í vetur. Fjölmargir listamenn komu fram með kórnum, íslenskir sem erlendir og við kveðjum veturinn reynslunni ríkari.

Fimm tónleikar voru haldnir á tímabilinu, þrennir af þeim fóru fram tvisvar. 30. október flutti Fílharmónían tónlist eftir George Gershwin og Jassmessu eftir Vytautas Miškinis. Tónleikarnir voru fluttir í Norðurljósasal Hörpu. Aðventutónleikar fóru fram í Langholtskirkju dagana 11. og 13. desember. 16. og 17. febrúar flutti Sinfóníuhljómsveit Íslands Hringadróttinssinfóníu Howards Shore, ásamt Fílharmóníunni, Kór Áskirkju, Hljómeyki og Stúlknakór Reykjavíkur. Aldarminning Róberts Abrahams Ottóssonar, stofnanda kórsins, var heiðruð 19. apríl í Langholtskirkju og 21. apríl í Skálholtsdómkirkju. Flutt voru verk útsett af honum en einnig frumflutti kórinn verkið Náttsöng, sem Hildigunnur Rúnarsdóttir samdi af þessu tilefni. Starfsárinu lauk á Listahátíð í Reykjavík þann 25. maí með samstarfi Sinfóníuhljómsveitarinnar annars vegar og Fílharmóníunnar, Kór Áskirkju og Hljómeyki hins vegar við flutning á Rómeó og Júlíu eftir Hector Berlioz. Fóru tónleikarnir fram í Eldborgarsal Hörpu.

Söngfólk Fílharmóníunnar hleypur nú út í sumarið með bros á vör eftir annir vetrarins. Við taka sumarstörf, frí og fjölskyldulíf eins og vera ber. Við þökkum öllum þeim sem hafa unnið með okkur í vetur fyrir samstarfið, sem og þeim sem komu og hlýddu á tónleikana okkar. Þar ber ekki síst að nefna fyrrum félaga Fílharmóníunnar sem okkur þótti afar vænt um að fá að syngja fyrir og deila minningum með.

Við hlökkum til að takast á við ný verkefni á komandi hausti, með gömlum vinum og nýjum.

Gleðilegt sumar!