Aðventutónleikar Fílharmóníu – Þú gjörir gleðina mikla

Söngsveitin Fílharmónía syngur inn jólin í Kristskirkju fimmmtudaginn  12.desember kl 20.  Á efnisskránni er fjölbreytt hátíðartónlist m.a.  eftir Báru Grímsdóttur, Magnús Ragnarsson, Berlioz og Rachmaninoff.

Stjórnandi kórsins er Magnús Ragnarsson og mun hann einnig leika á orgel kirkjunnar. Gestastjórnandi á tónleikunum er Sigurður Árni Jónsson.

Miðaverð á tónleikana er 2000 kr og fást miðar hjá kórfélögum, í 12 Tónum Skólavörðustíg og í safnaðarheimili kirkjunnar, rétt fyrir tónleika. Frítt fyrir börn 12 ára og yngri.

Komum saman í Kristskirkju 12. desember, eigum notalega stund og fögnum hátíðinni.

Fílharmónía lætur sér ekki nægja tónleikahald í upphafi jólahátíðar heldur blæs hún einnig til sannkallaðrar jólagleði á jólatónleikum í Háteigskrikju laugardaginn 28. desember kl. 20. Þar koma fram ásamt kórnum, Benedikt Kristjánsson, tenór og Sophie Marie Schoonjans, hörpuleikari. Á tónleikunum verða m.a. flutt verk eftir Oliver Kentish og Jórunni Viðar.

Stjórnandi er Magnús Ragnarsson.

Miðaverð er eins og áður 2000 kr og fást miðar hjá kórfélögum, í 12 Tónum Skólavörðustíg og í

anddyri Háteigskirkju á örlítið hærra verði eða 2500 kr. Frítt fyrir börn 12 ára og yngri.

Söngsveitin Fílharmónía syngur Klezmer

8.nóvember kl.20:00 í Áskirkju
9.nóvember kl.17:00 í Áskirkju

Hausttónleikar Fílharmóníu verða að þessu sinni helgaðir Klezmertónlist. Síðast hélt kórinn Klezmertónleika árið 2008 og nýtur sem fyrr liðsinnis systkinanna Ragnheiðar og Hauks Gröndal. Ragnheiður sér um einsöng og Haukur fer fyrir Þjóðlagasveit sinni „Skuggamyndir frá Býsans“. Stjórnandi Fílharmóníu er Magnús Ragnarsson.

Haldnir verða tvennir tónleikar í Áskirkju. Þeir fyrri verða föstudaginn 8. nóvember kl. 20 og þeir seinni daginn eftir, 9. nóvember, kl. 17.

Hægt er að tryggja sér miða á 2.500 kr. í forsölu hjá kórfélögum eða í Tólf tónum á Skólavörðustíg. Miðar við innganginn kosta 3.000 kr. Frítt er fyrir 12 ára og yngri.

Söngsveitin tekur þátt í kórahátíð!

Söngsveitin Fílharmónía tekur þátt í kóramóti Landssambands blandaðra kóra í Hörpu, helgina 18.-20.október 2013. Þar munu 24 kórar syngja fyrir gesti og gangandi í Norðurljósum og víðsvegar um húsið.

Laugardagur
Á laugardeginum er mikið um að vera í húsinu öllu, þegar kórarnir skiptast á að syngja eigin dagskrá. Röðin kemur að okkur kl.14:00 í Norðurljósum.
Aðgangur er ókeypis.

Sunnudagur
Á sunnudeginum kl. 15 verða sameiginlegir hátíðartónleikar í Eldborg. Þá koma 900 söngvarar fram og syngja saman UPPHAF, lag Hreiðars Inga Þorsteinssonar við ljóð Ingibjargar Haraldsdóttur, íslensk kórlög og sænskt kórverk undir stjórn Robert Sund. Fílharmónía kemur einnig fram á tónleikunum í Elborg með eigin dagskrá; Cloudburst eftir bandaríska tónskáldið Eric Whittacre. Miða á hátíðartónleikana má nálgast hér.

Upplýsingar um kórahátíðina á vef Hörpu má sjá hér.

 

Starfið framundan – haust 2013

Vetrarstarfið fer vel af stað og nú fer Sveitin í ferðalag!

Laugardaginn 28. september liggur leiðin í Mýrdalinn þar sem sungnir verða tónleikar í Skeiðflatarkirkju kl. 16. Kórinn mun hafa stutta viðkomu í Sögusetrinu á Hvolsvelli, skoða Njálurefilinn og taka lagið fyrir saumafólkið! Þá kemur kórinn við á Skógum, skoðar byggðasafnið og tekur lagið í kirkjunni.  Það eru mörg verkefnin sem kórin tekur þátt í og hér má sjá brot af því sem á dagskránni er fram til áramóta.

  • Í október tekur Söngsveitin þátt í söngdagskrá í Hörpunni sem Landsamband blandaðra kóra stendur fyrir. Þar mun kórinn syngja, einn og með öðrum kórum í Norðurljósum og Eldborgarsal.
  • Flutt verður klezmertónlist í Áskirkju ásamt Ragnheiði Gröndal og hljómsveit Hauks Gröndal í nóvember.
  • Kórinn mun að sjálfsögðu syngja inn jólafriðinn í desember, í Kristskirkju fyrir jól og í Háteigskirkju milli jóla og nýárs.
Nánari dagskrá birtist síðar.

Gleðilegt sumar!

Nú er sumar, gleðjist gumar!

Fílharmónían lauk starfsári sínu með aðalfundi þann 3. júní síðastliðinn. Veturinn hefur verið viðburðaríkur og kórinn tekist á við fjölbreytt verkefni að vanda. Tónleikar voru sex talsins en sumir voru haldnir oftar en einu sinni og kom kórinn því fram alls tólf sinnum. Í október fluttum við Maríumúsík eftir Anders Öhrwall og Misa Criolla eftir Ariel Ramirez í Seltjarnarneskirkju og Guðríðarkirkju. Í desember tók kórinn þátt í Frostrósum og söng með á fimm tónleikum sem haldnir voru í Hörpu. Ákveðið var að halda jólatónleika og fóru þeir fram í Kristskirkju þann 27. desember og var efnisskráin fjölbreytt.

Í upphafi nýs árs byrjuðu stífar æfingar á Carmina Burana eftir Carl Orff og naut kórinn aðstoðar fleiri kórsöngvara við það verkefni. Tónleikarnir fóru fram í Hörpu þann 7. febrúar og stjórnaði Hermann Bäumer kórnum og Sinfóníuhljómsveit Íslands.

Hið klassíska verk, Requiem eftir Gabriel Fauré, var flutt tvisvar: í messu á skírdagskvöld (18. apríl ) í Áskirkju og í Reykholti þann 4. maí. Þann 21. apríl hélt kórinn tónleika í Seltjarnarneskirkju undir heitinu Tíminn og vatnið og var það nokkurs konar þema tónleikanna. Hluti af þeirri efnisskrá var svo fluttur ásamt Requiem í Reykholti.

Á aðalfundinum var kosinn ný stjórn. Agla Ástbjörnsdóttir tók við sem formaður af Lilju Árnadóttur. Í aðalstjórn sitja nú Haukur Kristófersson, Edda Þöll Kentish, Þóra Harðardóttir og Harpa Ósk Valgeirsdóttir. Í varastjórn eru Þengill Ólafsson, Birna Kristín Eiríksdóttir og Guðjón Emilsson.

Fílharmónían tekur sér frí í sumar og syngur aðallega í grillveislum og útilegum 🙂
Við hlökkum til næsta starfsárs, sem bíður fullt af spennandi áskorunum og skemmtilegum tækifærum.

Gleðilegt sumar!