Næstu tónleikar Fílharmóníu verða í Selfosskirkju laugardaginn 26. apríl kl. 17.  Þar mun kórinn flytja fjölbreytta efnisskrá sem einnig verður flutt í kórakeppni í Llangollen í Wales í júlí.Efnisskráin samanstendur af ýmsum verkum íslenskra og erlendra tónskálda, svo sem eftir Ola Gjeilo, Z. Randall Stoope, Báru Grímsdóttur og Hreiðar Inga Þorsteinsson svo fátt eitt sé nefnt. Aðgangseyrir er 2000 kr.

Söngsveitin Fílharmónía heldur þrenna tónleika í mars og apríl.

Þeir fyrstu verða haldnir í Neskirkju laugardaginn 15.mars kl. 17. Tónleikarnir eru haldnir í samvinnu við Kór Neskirkju og munu kórarnir koma fram saman og í sitt hvoru lagi. Boðið verður upp á góða blöndu af íslenskum og erlendum kórlögum, gömlum og nýjum. Frítt er inn og allir hjartanlega velkomnir.

Mánudaginn 17.mars kl. 20:30 er komið að tónleikum í Grindvíkurkirkju og eru tónleikarnir liður í Menningarviku bæjarins sem fagnar fjörutíu ára kaupstaðarafmæli á þessu ári. Frítt er inn á tónleikana. Á efnisskránni eru íslensk og erlend kórlög.

Í apríl liggur leið Fílharmóníu austur fyrir fjall er sungnir verða tónleikar í Selfosskirkju laugardaginn 26.apríl kl. 17.

Tónleikadagskrá Söngsveitarinnar Fílharmóníu vorið 2014

Laugardagur 15.mars:
Tónleikar í Neskirkju ásamt kirkjukórnum þar.
Tónleikar hefjast kl. 17

Mánudagur 17.mars
Tónleikar í Grindavíkurkirkju kl. 20:30

Laugardagur 26.apríl
Tónleikar í Selfosskirkju kl. 17.

Helgin 16.-18.maí
Tónleikar á laugardeginum í Siglufjarðarkirkju og á sunnudeginum í Akureyrarkirkju ásamt kirkjukórnum þar.

Fimmtudagur 5. júní
Tónleikar í Háteigskirkju.

Söngsveitin Fílharmónía þakkar liðið söngár og tekur fagnandi á móti því nýja. Haustið hófst með skemmtilegri  ferð í Mýrdalinn með viðkomu í Sögusetrinu á Hvolsvelli og Byggðasafninu á Skógum. Sungnir voru tónleikar í Skeiðflatarkirkju og tekið hús á heiðurshjónunum og fyrrum félögum þeim Guðmundi og Önnu.  Í október tók Fílharmónía þátt í fjölmennri kórahátíð í Hörpu.  Auk þess að koma fram með öðrum þátttökukórum á aðaltónleikum hátíðarinnar söng kórinn eigin dagskrá í Norðurljósum og Eldborg.  Kórinn hlaut mikið lof fyrir frammistöðu sína á hátíðinni.  Venju samkvæmt voru hausttónleikar Fílharmóníu vegleg tónlistarveisla.  Að þessu sinnu varð hátíðartónlist gyðinga, klezmertónlist fyrir valinu. Haldnir voru tvennir tónleikar í Áskirkju í nóvember með Þjóðalagasveitinni Skuggar Býsans og hinni frábæru söngkonu Ragnheiði Gröndal.  Aðsókn var góð, gestirnir ánægðir og kórinn í skýjunum. Þá hófust æfingar fyrir aðventu- og jólatónleika. Aðventutónleikarnir voru haldnir í Kristskirkju þann 12. desember og jólatónleikarnir í Háteigskirkju þann 28.desember.  Benedikt Kristjánsson einsöngvari og Sophie Marie Schoonjans hörpuleikari komu fram með kórnum í Háteigskirkju. Þau voru stórkostleg og uppskáru, ásamt kór, mikið lof tónleikagesta. Fjölmargir þeirra höfðu á orði að mikil helgi hefði verið yfir tónleikunum.
Í desember barst jákvætt svar við umsókn Fílharmóníu um þátttöku í kórakeppni og mikilli tónlistarveislu á sumri komanda í Llangollen í Wales. Félagar Fílharmóníu hlakka til keppninnar og hefja undirbúning strax í janúar.

Home

Söngsveitin Fílharmónía syngur inn jólin í Kristskirkju fimmmtudaginn  12.desember kl 20.  Á efnisskránni er fjölbreytt hátíðartónlist m.a.  eftir Báru Grímsdóttur, Magnús Ragnarsson, Berlioz og Rachmaninoff.

Stjórnandi kórsins er Magnús Ragnarsson og mun hann einnig leika á orgel kirkjunnar. Gestastjórnandi á tónleikunum er Sigurður Árni Jónsson.

Miðaverð á tónleikana er 2000 kr og fást miðar hjá kórfélögum, í 12 Tónum Skólavörðustíg og í safnaðarheimili kirkjunnar, rétt fyrir tónleika. Frítt fyrir börn 12 ára og yngri.

Komum saman í Kristskirkju 12. desember, eigum notalega stund og fögnum hátíðinni.

Fílharmónía lætur sér ekki nægja tónleikahald í upphafi jólahátíðar heldur blæs hún einnig til sannkallaðrar jólagleði á jólatónleikum í Háteigskrikju laugardaginn 28. desember kl. 20. Þar koma fram ásamt kórnum, Benedikt Kristjánsson, tenór og Sophie Marie Schoonjans, hörpuleikari. Á tónleikunum verða m.a. flutt verk eftir Oliver Kentish og Jórunni Viðar.

Stjórnandi er Magnús Ragnarsson.

Miðaverð er eins og áður 2000 kr og fást miðar hjá kórfélögum, í 12 Tónum Skólavörðustíg og í

anddyri Háteigskirkju á örlítið hærra verði eða 2500 kr. Frítt fyrir börn 12 ára og yngri.