Vortónleikar með norrænu yfirbragði

Vetrarstarf Söngsveitarinnar Fílharmóníu hefur litast mjög af heimsfaraldri covid-19 eins og gefur að skilja, allt frá því að við neyddumst til að fresta flutningnum á Sálumessu Verdis í mars í fyrra þegar fyrst var gripið til samkomutakmarkana. Síðan þá hafa æfingar verið með ýmsu móti, fyrst voru þær alveg felldar niður en síðan var æft í smærri hópum sem dreifðu sér um vel loftræsta Langholtskirkju. Í haust tókum við tæknina í okkar þjónustu og streymdum æfingum yfir netið fyrir þau sem ekki treystu sér til að mæta í kirkjuna og einu sinni æfðum við úti undir beru lofti.

Flestar hefðir kórsins hafa orðið að lúta í lægri haldi fyrir veirunni, engir vortónleikar voru haldnir og hvorki hausttónleikar né jólatónleikar, auk þess sem fjölda fyrirhugaðra verkefna var frestað. En þrátt fyrir ástandið höfum við haldið starfseminni gangandi og því langar okkur að ljúka starfsárinu með því að flytja lögin sem við höfum verið að æfa við þessar óvenjulegu aðstæður. Það eru ný og gömul verk eftir norræn tónskáld, allt frá Færeyjum til Finnlands, þar á meðal stjórnanda kórsins, Magnús Ragnarsson.

Tónleikarnir verða í Langholtskirkju sunnudaginn 30. maí kl. 20.

Aðgangur er ókeypis og allur aðbúnaður í samræmi við gildandi leiðbeiningar um sóttvarnir.

Næsta starfsár kórsins stefnir svo í að vera töluvert ólíkt því sem lýkur með þessum tónleikum, en ef áætlanir standast verður dagskráin á þessa leið:

  • Ágúst: Return of the King – bíósýning með lifandi tónlist
  • September: Níunda sinfónía Beethovens með Sinfóníuhljómsveit Íslands
  • Október: Söngleikurinn Chess
  • Nóvember: Tónleikar Andrea Boccelli
  • Desember: Jólatónleikar
  • Janúar: Requiem eftir Verdi – afmælistónleikarnir okkar frá í fyrra
  • Mars: Þýska sálumessan eftir Brahms með Sinfóníuhljómsveit Íslands

Nú er hún Grýla dauð

Söngsveitin Fílharmónía hefur varla getað komið saman til að æfa síðan í mars, þegar sett var á samkomubann um það leyti sem kórinn hugðist flytja Sálumessu Verdis með stórri hljómsveit fyrir fullum sal af fólki. Enn á eftir að koma í ljós hvenær þeir tónleikar geta orðið og þökkum við þeim sem þegar hafa keypt sér miða fyrir biðlundina.

Að undanförnu hafa verið haldnar kóræfingar á netinu, sem fara þannig fram að hver söngvari syngur fyrir framan sína tölvu og heyrir bara í kórstjóranum og sjálfum sér. Þannig höfum við æft jólalögin, þótt enn sé óvíst hvenær og hvernig þau verða flutt. En til að gleðja okkur sjálf og vonandi fleiri tókum við eitt þeirra upp, Grýlu eftir Leif Hauksson og Pétur Gunnarsson, í útsetningu Magnúsar Ragnarssonar. Um klippingu og hljóðblöndun sá Gunnar Freyr Steinsson. Ætli þetta sé ekki glaðlegasta andlátsfregn sem samin hefur verið?

Requiem eftir Verdi og fleira á vorönn

Söngsveitin Fílharmónía situr ekki aðgerðarlaus þessa vorönnina, frekar en venjulega. 28. febrúar tekur kórinn þátt í aukasýningu á Evitu í Hörpu, í samstarfi við Sinfóníuhljómsveit Norðurlands og með stórkostlegum einsöngvurum. Miðasala á tix.is.

Í tilefni af sextugsafmæli kórsins flytur hann eina rómuðustu sálumessu sem samin hefur verið, Messa da Requiem eftir Giuseppe Verdi, ásamt stórri sinfóníuhljómsveit og glæsilegum hópi einsöngvara: Hallveigu Rúnarsdóttur, sópran, Hildigunni Einarsdóttur, alt, Gissuri Páli Gissurarsyni, tenór og Kristni Sigmundssyni, bassa. Konsertmeistari er Sif Tulinius og stjórnandi Magnús Ragnarsson.

Tónleikarnir verða í Langholtskirkju, sunnudaginn 15. mars kl. 17. Miðaverð er 6.800 kr., 6.000 kr fyrir börn, aldraða og öryrkja. Miðasala á tix.is. Tónleikunum hefur verið frestað til hausts – ný dagsetning verður auglýst sem fyrst.

Um páskana tekur svo við annað samstarfsverkefni með Sinfóníuhljómsveit Norðurlands, en þá er það 9. sinfónía Beethovens, Óðurinn til gleðinnar. Verkið verður flutt í Hofi á Akureyri á skírdag, 9. apríl, og Langholtskirkju 11. apríl. Miðasala enn og aftur á tix.is; fyrir Hof og fyrir Langholtskirkju.

Síðast en alls ekki síst tekur kórinn þátt í tónleikum Andrea Bocelli í Kórnum 23. maí – og miðar á tix.is.

Söngur í sextíu ár – Hausttónleikar og samsöngur

Söngsveitin Fílharmóna slær upptaktinn að sextíu ára afmælisári sínu með hausttónleikum og samsöng í Seltjarnarneskirkju, laugardaginn 2. nóvember kl. 15. Flutt verða ýmis uppáhaldsverk úr sögu kórsins í bland við nýrri tónlist.

Frá æfingu á fyrsta starfsári kórsins
Á æfingu í Melaskóla á fyrsta starfári, helsta æfingastað kórsins lengi vel.
Róbert A. Ottóson fremst til hægri.

Miðaverð er 1.500 kr., miðapantanir hjá kórfélögum, með skilaboðum á Facebook, og á songsveitin@filharmonia.is, og miðasala við innganginn. Frítt inn fyrir börn og unglinga, 18 ára og yngri.

Að tónleikunum loknum verður afmæliskaffi og samsöngur í safnaðarheimili kirkjunnar þar sem við vonumst eftir að sem flestir, bæði fyrrverandi kórfélagar og aðrir gestir, taki með okkur nokkur lög og fagni tímamótunum!

Samstarfsverkefnið Requiem eftir Mozart

Vormisserið 2019 var helgað Requem eftir Wolfgang Amadeus Mozart sem Söngsveitin Fílharmónía flutti fyrir fullu húsi í Hofi á Akureyri og Langholtskirkju í Reykjavík ásamt Sinfóníuhljómsveit Norðurlands, Kammerkór Norðurlands og einvala liði einsöngvara: Garðari Thór Cortes, Hönnu Dóru Sturludóttur, Ágústi Ólafssyni og Helenu Guðlaugu Bjarnadóttur. Um tónsprotann hélt finnski hljómsveitarstjórinn Anna Maria Hellsing, sem er eftirsótt um allan heim þessi árin og heillaði bæði flytjendur og áhorfendur upp úr skónum.

Ljósmynd: https://www.arcticshots.is

Söngsveitin Fílharmónía hefur átt farsælt samstarf við Sinfóníuhljómsveit Norðurlands að undanförnu, meðal annars við uppfærsluna á fyrstu tveimur kvikmyndunum úr Lord of the Rings-þríleiknum í Hörpu með lifandi tónlist. Gaman var að fylgja því vel heppnaða verkefni eftir með flutningi á sálumessu Mozarts, einni af skærustu perlu tónbókmenntanna, og aldrei að vita nema framhald verði á samstarfinu.